ლოზანაში მიმდინარე ზამთრის მესამე ახალგაზრდულ ოლიმპიურ თამაშებზე დღეს, ფიგურულ ციგურაობაში  მედლების ბოლო კომპლექტი გათამაშდა. ამჯერად ოლიმპიური მედლებისთვის იბრძოდნენ ე.წ. შერეული ინტერნაციონალური გუნდები. თითოეული გუნდი შედგებოდა მოცეკვავე და სპორტული წყვილების, გოგონათა და ვაჟთა ერთეულთა თანრიგის ფიგურისტებისგან. სწორედ ამ დისციპლინაში გაიმარჯვა გუნდმა (Team Courage), რომლის შემადგენლობაშიც შედიოდა ალინა ბუტაევა-ლუკა ბერულავას ქართული წყვილი.

საქართველოს ფიგურისტებთან ერთად, ოლიმპიური ოქროს მედლები მიიღეს ესტონეთის, რუსეთის და იაპონიის სპორტსმენებმა. ესტონეთი ვაჟთა ერთეულებში იყო წარმოდგენილი, რუსეთი - გოგონათა ერთეულებში, იაპონია - ცეკვებში, საქართველო კი - წყვილებში.

ამ დისციპლინაში სულ 8 გუნდი გამოდიოდა. გამარჯვებულმა გუნდმა კონკურენტებს საკმაო უპირატესობით გაუსწრო.

აღსანიშნავია, რომ ბერულავა-ბუტაევას წყვილმა საქართველოს, ზამთრის ახალგაზრდული ოლიმპიური თამაშების ისტორიაში, პირველი წარმატება მესამე საშეჯიბრო დღეს მოუტანეს, როდესაც ბრინჯაოს მედლების მოპოვება შეძლეს.