სუპერლიგის მე-13 ტურის მორიგ მატჩში მგზავრებმა ბათუმს უმასპინძლა. კიდევ ორი მატჩი, თბილისსა და რუსთავში გაიმართა.

მას შემდეგ, რაც გუშინ ცხუმ-აფხაზეთმა ოლიმპი დაამარცხა, მგზავრები ბოლო ადგილზე მარტო დარჩა და შესაბამისად, დღეს ბათუმთან მატჩსაც მეტი ფასი დაედო. ბუბა ბერიშვილის გუნდს გამარჯვება ესაჭიროებოდა, რათა რეგულარული ჩემპიონატის დარჩენილ მატჩებში მოახერხოს ცხრილში დაწინაურება და სუპერლიგიდან გავარდნის თავის არიდება.

თავის მხრივ, მეორე ადგილზე მყოფი ბათუმი პირველობისთვის იბრძვის და მგზავრების ძლევის შემთხვევაში ლიდერ თსუ-ს უსწრებდა. გია კაზანჯიანის გაწვრთნილმა აჭარელებმა თავისი წილი საქმე გააკეთეს და მგზავრების ძლევით ცხრილში პირველ ადგილზე გადაინაცვლეს. თსუ დღეს 16:00 საათზე ქუთაისს ეთამაშება და თუ წაიფორხილებს, ბათუმელები პირველ ადგილზე დარჩებიან.

რაც შეეხება მგზავრები-ბათუმის მატჩს, საკმაოდ დაძაბული გამოდგა. მართალია, ზღვისპირელებმა თამაში შედეგიანად დაიწყეს და პირველი პერიოდი 24:18 მოიგეს, თუმცა მგზავრებმა სწორი ტაქტიკა აირჩიეს და სწრაფი თამაშის ხარჯზე, ელვისებური გარღვევებით თამაში თანაბარ კალაპოტს დაუბრუნეს. დიდი შესვენებისთვის ბათუმელთა ლიდრობიდან 2 ქულა დარჩა, თუმცა მესამე პერიოდში დაახლოებით ეს სხვაობა შენარჩუნდა - ვერც ერთი გუნდი ვერ ახერხებდა ხელჩასაჭიდი უპირატესობის მოპოვებას. 

კვანძი ბოლო წუთებზე გაიხსნა, როცა ბათუმელებმა მეტოქის შეცდომებით ისარგებლეს. მგზავრებმა სოლიდური უპირატესობა მიიღეს, როცა ბოლო პერიოდში ზღვისპირელთა 2 საკვანძო მოთამაშე - ცენტრი ნიკოლა ვუიოვიჩი და გამთამაშებელი ნიკოლაოს დიპლაროსი პერსონალურების ლიმიტის გამო მოედნიდან გავარდნენ. შეხვედრის ბოლო წუთი ახალი დაწყებული იყო, როცა ალექსანდრე ფევაძემ ძალიან საჭირო სამქულიანი ჩააგდო, ბათუმი 83:75 დააწინაურა და მატჩის ბედიც გადაწყდა. საბოლოოდ აჭარულმა გუნდმა 84:80 (სტატისტიკა) გაიმარჯვა და როგორც მოგახსენეთ, პირველ ადგილზე გადაინაცვლა.

24 ქულითა და 8 მოხსნით ბათუმელებს კოლინ მალკოლმმა ულიდერა. 16 ქულა დააგროვა ნიკოლა ვუიოვიჩმა, ხოლო დიპლაროსმა თავის გუნდს 15 ქულა შესძინა. მგზავრებში 22 ქულით ტაჯ სპენსერი გამოირჩა, ლოველ ქაბილმა შეხვედრა 21 ქულით დაასრულა.

თსუ-მ პირველი წრე სოლიდური - მდევარ ბათუმთან და დინამოსთან 2-ქულიანი უპირატესობით დახურა, თუმცა მიზეზთა გამო 2 ლეგიონერი დაკარგა და სანამ ახალწვეულები შეთამაშდებიან, გარკვეული პრობლემები აქვს. ახალმა ლეგიონერებმა დღეს საკმაოდ კარგად ითამაშეს და თსუ ბოლო პერიოდამდე ამარცხებდა ქუთაისს, თუმცა კოტე ტუღუშის გაწვრთნილმა იმერულმა კლუბმა მებრძოლი ხასიათი გამოავლინა და გამარჯვებას მიაღწია.

მატჩის დასრულებამდე 6 წუთით ადრე თსუ 69:65 იგებდა, რა დროსაც ქუთაისელებმა გაქცევა მოაწყვეს. ჯოვან მურინგის, გიორგი ბარბაქაძისა და ჯეიმს მილიკენის ქულებით სტუმრებმა 12:0 მოიგეს 4-წუთიანი მონაკვეთი და 77:69 გალიდერდნენ. მატჩის ბედიც აქ გაირკვა. შეხვედრის დასრულებამდე 2 წუთი იყო და უნივერსიტეტელებს ვითარების შესაცვლელად არც დრო დარჩათ და არც ძალა. ქუთაისმა საბოლოოდ 84:73 (სტატისტიკა) იმარჯვა. 

სტუმრებს 28 ქულით ჯოვან მურინგმა ულიდერა. 18 ქულა დააგროვა გიორგი ბარბაქაძემ, ხოლო ჯეიმს მილიკენის ანგარიშზე 15 ქულა დაგროვდა. თსუ-ში 21 ქულით დევიდ მაკფარლანდი გამოირჩა. 16 ქულა ჰქონდა ჯიბრილ ფოლკნერს, ხოლო გიორგი კორსანტიამ შეხვედრა 11 ქულით დაასრულა.

ტურის ბოლო შეხვედრაში, რუსთავში, ადგილობრივმა გუნდმა, კაკტუსი 78-67 (სტატისტიკა) დაამარცხა.