დღეს და გუშინ, საქართველოს დავით ყიფიანის თასის ¼ ფინალები გაიმართა და შესაბამისად, ნახევარფინალისტების ვინაობაც გაირკვა.

26 სექტემბერი

„სპაერის" სტადიონზე ლიგა 3-ის წარმომადგენელმა "თბილისი სიტიმ" ეროვნულ ლიგაში მოასპარეზე საჩხერის "ჩიხურას" უმასპინძლა. მატჩი იმერელთა დამაჯერებელი გამარჯვებით, ანგარიშით - 5-2 დასრულდა. გამარჯვებულთა მხრიდან დუბლი კახა კახაბრიშვილმა შეასრულა, თითო გოლი კი, ბესო დეკანოიძემ, ლუკა კიკაბიძემ და დავით მუჯირმა გაიტანეს. "თბილისი სიტის" შემადგენლობიდან კი, მეტოქის კარის აღება ლევან ქალდანმა და გიორგი შუბითიძემ მოახერხეს.

​სათამაშო დღის მეორე შეხვედრა წყალტუბოს 26 მაისის სტადიონზე გაიმართა. ადგილობრივმა "სამგურალმა" "თელავს" უმასპინძლა და მეტოქე ანგარიშით,  2-0 დაამარცხა. შეხვედრაში პირველი გოლი მე-10 წუთზე გავიდა, მეტოქის კარი გამოცდილმა ლუკა რაზმაძემ აიღო. რაზმაძეს 52-ე წუთზე დუბლის შესრულებაც შეეძლო, თუმცა მისი დარტყმული პენალტი ძელმა მოიგერია. საბოლოდ წყალტუბოელებმა მეორე გოლის გატანა მაინც მოახერხეს. 56-ე წუთზე "თელავს" დემურ ჩიხლაძემ გაუტანა და საბოლოო ანგარიში დააფიქსირა.

27 სექტემბერი

თბილისის "საბურთალომ" მიხეილ მესხის სახელობის სტადიონზე ქუთაისის "ტორპედოს" უმასპინძლა. თასის მოქმედმა მფლობელმა მეტოქეს ორი უპასუხო გოლი გაუტანა, 2-0 გაიმარჯვა და ნახევარფინალში თამაშის უფლება მოიპოვა. ანგარიში 65-ე წუთზე გაიხსნა, საბურთალოელთა კაპიტანმა გაგი მარგველაშვილმა "ტორპედოს" პენალტით გაუტანა. ქუთაისელთა კარში გატანილი მეორე გოლის ავტორი 79-ე წუთზე ოლივიე ბუმალი გახდა.

საინტერესო გამოდგა სფფ-ის ტექნიკური ცენტრის "ბასას" მოედანზე გამართული მატჩი, სადაც ერთმანეთს "გაგრა" და გორის "დილა" დაუპირისპირდნენ. შეხვედრის ძირითადი და დამატებითი დრო გატანილი გოლების გარეშე, 0-0 დასრულდა. პენალტების სერია კი უკეთ გაგრელებმა შეასრულეს და მეტოქე ანგარიშით,  5-3 დაამარცხეს.

***

შესაბამისად,  ცნობილია,  საქართველოს თასის 2020 წლის გათამაშების ნახევარფინალის მონაწილე ოთხივე კლუბი ვინაობა. დავით ყიფიანის სახელობის თასისთვის ბრძოლას საჩხერის "ჩიხურა", წყალტუბოს "სამგურალი", თბილისის "საბურთალო" და "გაგრა" აგრძელებენ.

ფოტო: სკ "გაგრა"