გუშინ ბათუმში დაწყებული სუპერლიგის მე-11 ტური დღეს თბილისში გაგრძელდა. ოლიმპიურ სასახლეში დაგეგმილი 2 მატჩიდან პირველში "კაკტუსი" და "მგზავრები" შეხვდნენ. ორივე გუნდს სჭირდებოდა გამარჯვება, თუმცა მგზავრებისთვის ამ შეხვედრას უფრო დიდი მნიშვნელობა ჰქონდა. ბუბა ბერიშვილის გაწვრთნილი გუნდი 10 მატჩიდან 2 გამარჯვებით ბოლო ადგილზე გახლდათ და თითოეულ შეხვედრას მგზავრებისთვის ფასი აქვს. 

კაკტუსელები ცხრილის შუაწელში კი არიან, თუმცა იქ ისეთი სიმჭიდროვეა, რომ შესაძლოა 2 წაგებით აუტსაიდერებში აღმოჩნდე. ამიტომაც, არჩილ ჟღენტის გაწვრთნილი კაკტუსი ძალიან მობილიზებული შეხვდა ამ მატჩს და ლიდერობა თავიდანვე რომ მოიპოვა, მთელი თამაში სტაბილურად ინარჩუნებდა.

კაკტუსელებმა საბოლოოდ სასურველ დასასრულამდე მიიყვანეს მატჩი და მიმდინარე სუპერლიგაში მე-5 გამარჯვება მოიპოვეს - 85:77 (სტატუისტიკა). ჟღენტის გუნდს 26 ქულით ლევან მასხულიამ ულიდერა. 17 ქულა და 6 მოხსნა ჰქონდა სანდრო სანაძეს, სამაი ჰეინს-ჯონსმა კი 16 ქულა, 8 მოხსნა და 8 პასი მიითვალა. მგზავრებში 22 ქულით ბომბარდირი გახდა ჯეიდონ კოჰი, სოსო გოგნაძის ანგარიშზე კი 12 ქულა და 10 მოხსნა დაგროვდა.

დინამოსა და ოლიმპის დაპირისპირებამ ბოლო პერიოდში განსაკუთრებული მნიშვნელობა შეიძინა. ამ გუნდებს ერთმანეთთან პირადი ანგარიშები აქვთ და თითქმის ყველა მათი მატჩი უაღრესად დაძაბულია, თუმცა დღევანდელი განსაკუთრებული გამოდგა. შეხვედრა 1 ქულის სხვაობით - 84:83 (სტატისტიკა) დასრულდა. გაიმარჯვა დავით როგავას გაწვრთნილმა ოლიმპმა და ცხრილის შუაში პოზიცია გაიმყარა. 

თავისუფლად შეიძლებოდა, ეს მატჩი 1 ქულით დინამოელებს მოეგოთ. მეტიც, ამის დიდი შანსი იყო, თუმცა ფარქვეშ შეჭრილმა ნიკოლოზ დარბაიძემ მატჩის ბოლო წამზე გამარჯვების ბურთი ააცილა. ეს ისეთი მომენტი გახლდათ, მოთამაშეები 10-დან 9-ს რომ აგდებენ, თუმცა ბოლო წამზე, როცა ამ ბურთზე მატჩის ბედი ჰკიდია, ემოციური მუხტი მატულობს და ბურთის ჩაგდებას ნერვების სხვაგვარი სიმტკიცე სჭირდება.

არადა, თითქოს ყველაფერი ოლიმპელთა სასარგებლოდ იყო გადაწყვეტილი. როგავას გუნდი 4 ქულით იგებდა, დასრულებამდე კი ათიოდ წამი იყო. ბოლოსწინა შეტევაში ლაშა მიქელაძემ სამქულიანი ჩააგდო და ცხადია, დროის მოსაგებად, დინამოელებმა ტაქტიკური ჯარიმა აიღეს. საფინალო სირენამდე 8 წამით ადრე ოლიმპელთა ამერიკელი ლეგიონერი კენდრიკ ტომპსონი საჯარიმოს ხაზზე დადგა, თუმცა ორივე სროლა ააცილა და ფარიდან ასხლეტილი ბურთის მოსაპოვებლად ბრძოლა გაიმართა. საბოლოოდ ბურთი დინამოელებმა მოიხელთეს, თუმცა შესატევად 4 წამზე ნაკლები დარჩათ. მუჰამედ ტაჩის გაწვრთნილმა კალათბურთელებმა მოასწრეს შეტევის განხორციელება, ბურთი პერიმეტრზე დარბაიძემდე მიიტანეს, რომელმაც პოტენციურად გამარჯვების მომტანი გარღვევა განახორციელა, თუმცა, როგორც აღვნიშნეთ, ბურთი ფარში ვერ მოათავსა...

ოლიმპში ბომბარდირი გახდა კახა ჯინჭარაძე, რომელმაც 32 ქულა მოაგროვა. 15 ქულითა და 13 მოხსნით ლუკა კალატოზიშვილი გამოირჩა. დონოვან სმიტის ანგარიშზე 10 ქულა დაგროვდა. დინამოში 25 ქულა დააგროვა ტაილერ უილიამსმა. 15 ქულა ლუკა ბულაშვილმა, ხოლო 14 ქულა და 11 მოხსნა ალონზო უოკერმა მიითვალეს. 

სუპერლიგის მორიგი მატჩები კვირას, 7 თებერვალს თბილისსა და ქუთაისში გაიმართება.