"დინამო თბილისი", რომელიც უიმედო აუტსაიდერად ითვლებოდა, ბოლო 2 მატჩი მოიგო და სუპერლიგაში დარჩენისთვის ბრძოლაში ჩაება. ჟოლივეტ ტუჯანის გაწვრთნილი გუნდი, რომელსაც ამ ტურამდე 2 მოგება და 11 მარცხი ჰქონდა, ერთ-ერთ კონკურენტ "ტიტებს" ხვდებოდა. ბესო ლეჟავას გაწვრთნილ გუნდს თავის მხრივ 5 მოგება და 7 მარცხი ჰქოდა და შესაბამისად, გასავარდნ ზონას რომ ასცილებოდა, გამარჯვება ჰაერივით სჭირდებოდა.

არ გამოვიდა. დინამოელებმა მობილიზებით, ერთ მუშტად შეკრული გუნდის საკადრისად ითამაშეს და დამსახურებული გამარჯვებით სუპერლიგაში დარჩენის შანსები გაიორმაგეს. ტუჯანის გუნდმა თან იმაზე მეტი სხვაობით იმარჯვა, რამდენიც "ტიტებთან" პირველ წრეში ჰქონდა წაგებული. დინამოელებმა წინა შეხვედრა დღევანდელ ოპონენტთან 78:83 დათმეს, ახლა კი 85:77 (სტატისტიკა) იმარჯვეს და რეგულარული ჩემპიონატის ბოლოს თანაბარი ქულების შემთხვევაში ცხრილში "ტიტებთან" უპირატესობა მიენიჭებათ.

მატჩის დაწყებამდე "ტიტების" ვეტერანს, აკაკი ლომოურს გუნდის მენეჯერმა, გიორგი ჯაფარიძემ სამახსოვო საჩუქარი გადასცა სუპერლიგაში საიუბილეო - მე-300 მატჩის ჩატარებასთან დაკავშირებით. ლომოურისთვის მრგვალი ნიშნული წინა - "ოლიმპთან" გამართული შეხვედრა იყო, "დინამოსთან" მატჩი კი მისი 301-ე კარიერული მატჩი იყო სუპერლიგაში. 

დინამოელებმა თავიდანვე რომ მოიპოვეს უპირატესობა, მეტოქესთვის სანსი არ მიუციათ. "ტიტები" მთელი შეხვედრის განმავლობაში მდევრის როლში იყვნენ და ცდილობდნენ ჩამორჩენის აღმოფხვრას, რის საშუალებასაც გამართულად მოთამაშე დინამოელები არ აძლევდნენ. თამაში ისე ჩამთავრდა, "ტიტებს" მოგების რეალური შანსი არ მისცემია. გამარჯვებულებს 24 ქულითა და 7 პასით ბენჯამინ ქოლეჯმა ულიდერა. 12 ქულა, 12 მოხსნა და 3 დაფარება ჯოშუა ნურსის ანგარიშზეა. ტიტებში 21 ქულითა და 15 მოხსნით საუკეთესო იყო ჯავიონ ოგუნიემი. 19 ქულა კრის პარკერის ანგარიშზეა.

***

საკალათბურთო კლუბ "კაკტუსის" წარმატებული სერია გრძელდება. ირაკლი ხოშტარიას გაწვრთნილმა გუნდმა მორიგი გამარჯვება "რუსთავთან" მოიპოვა და მოგებათა სერია 4 მატჩამდე გაზარდა. პირველი წრე კაკტუსელებმა 2 მოგებითა და 8 მარცხით დაასრულეს, რის შემდეგაც მთავარი მწვრთნელის პოსტზე არჩილ ჟღენტი ირაკლი ხოშტარიამ შეცვალა და გუნდს ხელი მყისიერად დაატყო. "კაკტუსი", რომელიც პირველი წრის შემდეგ სუპერლიგიდან "ა" ლიგაში დაქვეითების ერთ-ერთი კანდიდატი იყო, ზედიზედ 4 გამარჯვება მოიპოვა და ამგვარი საფრთხე ამ მომენტისთვის აღარ ემუქრება.

აღსანიშნავია, რომ დღევანდელი გამარჯვება კაკტუსელთათვის ორმაგად ფასობდა, რადგან მეტოქე უშუალო კონკურენტი "რუსთავი" იყო. ანატოლი ბოისას გაწვრთნილ ქვემოქართლურ გუნდს "კაკტუსზე" 1 მოგებით მეტი ჰქონდა და შეხვედრის დასრულების შემდეგ ამ ორივე გუნდს მოგებ-წაგებები გაუთანაბრდათ. "რუსთავსა" და "კაკტუსთან" ერთად 6 მოგების საპირწონედ 8 წაგება აქვს "მეგასაც". ეს გუნდები სუპერლიგის VI-VIII ადგილებს ამ თანმიმდევრობით იყოფენ - რუსთავი, კაკტუსი, მეგა.

რაც შეეხება უშუალოდ მატჩს, საკმაოდ დაძაბული, უშეღავათო და შესაბამისად, საინტერესო გამოვიდა. ლიდერი 7-ჯერ შეიცვალა, თანაბარი ანგარიშიც ამდენჯერ დაფიქსირდა. უმეტესად "რუსთავი" ლიდერობდა, თუმცა "კაკტუსი" რომ დამთმობი არ იყო და თავის შანსს ელოდა, ცხადზე უცხადესი იყო. კაკტუსელები თავის შანსს ელოდნენ და როცა მიეცათ, გამოიყენეს.

შეხვედრის დასრულებამდე სამწუთნახევრით ადრე რუსთაველები 80:76 იგებდნენ და გამარჯვებამდე მცირედი აკლდათ, თუმცა "კაკტუსის" ამერიკელმა მოთამაშეებმა, დერიკ ნიუტონმა და დენზელ ლივინგსტონმა როგორც დაცვაში, ისე შეტევაში შედეგიანი თამაშის წყალობით მოახერხეს გათანაბრება. ბოლო წუთზე ფრე იყო და "რუსთავი" უტევდა, როცა რაჰიმ ჯონსონს რევაზ როგავამ ჩაუჭრა და სწრაფი გარღვევით კაკტუსელები 86:84 დააწინაურა. რუსთაველთა მორიგ შეტევაში მერაბ ბოქოლიშვილს დენზელ ლივინგსტონმა დააფარა და როცა კაკტუსელმა ჯორდან ფორბსმა 2 საჯარიმო ჩააგდო, მატჩის ბედი გაირკვა - 88:84 (სტატისტიკა).

გამარჯვებულთაგან 30 ქულითა და 11 მოხსნით ჯორდან ფორბსი გამოირჩა. 20 ქულა, 14 მოხსნა და 5 პასი დენზელ ლივინგსტონის ანგარიშზეა. 18 ქულით დაასრულა შეხვედრა დერიკ ნიუტონმა. რუსთაველთაგან 24 ქულითა და 14 მოხსნით საუკეთესო იყო რაჰიმ ჯონსონი. 26 ქულა, 7 მოხსნა და 5 პასი ლუვეინ პიპკინსმა მოაგროვა.

სუპერლიგის მორიგი ტურის მატჩები 24 მარტს თბილისში და 25-ში ქუთაისში გაიმართება.

სატურნირო ცხრილი