ქართული სპორტული წყვილის, ანასტასია მეტელკინასა და ლუკა ბერულავას მიერ, მსუბუქმა, დახვეწილმა, ტექნიკურად რთული ელემენტებით გაჯერებულმა და სწრაფ ტემპში შესრულებულმა მოკლე პროგრამამ, შეკითხვას რატომ Why?, სწორედ Bronski Beat-ის ამ კომპოზიციაზე ასპარეზობენ მიმდინარე სეზონში ჩვენი ფიგურული მოციგურავეები, გასცა პასუხი კითხვას, თუ რატომ დაიმსახურეს ყველაზე მაღალი შეფასება უნგრეთში მიმდინარე ახალგაზრდულ მსოფლიო ჩემპიონატზე და მოკლე პროგრამის შემდეგ, უშუალო მდევარს, უკრაინულ წყვილს სოფია ჰოლიჩენკოს და არტიომ დარენსკის 11.78 ქულით გადაუსწრეს (იხილეთ ოქმი).

ანასტასიას და ლუკას, რომლებიც აღნიშნულ ტურნირზე მოქმედი ჩემპიონების რანგში ასპარეზობენ და ამასთან, ლუკას ასაკიდან გამომდინარე, ეს არის ბოლო შეჯიბრი მოცემულ ასაკობრივ კატეგორიაში, ტურნირის ფავორიტებად მიიჩნევენ. დღევანდელ სტარტამდე, მოკლე პროგრამაში, პერსონალური და სეზონის საუკეთესო შედეგი (72.26 ქულა) ქართულმა სპორტულმა წყვილმა 2024 წლის 5 დეკემბერს, ISU-ს გრან პრის ფინალში აჩვენა. თუმცა, გვახსოვს, იანვრის ბოლოს, ევროპის ჩემპიონატის დროს „ჩავარდნა" და ამის შედეგად მოკლე პროგრამაში მიღებული დაბალი (63.51) ქულა, რომელიც სხვაგვარად რომ ყოფილიყო მეტელკინასა და ბერულავას წყვილი, 2024-2025 წლების ევროპის ჩემპიონატის ბრინჯაოს მედლის ნაცვლად, ოქროს მედლის მფლობელიც თავისუფლად იქნებოდა.

თუმცა, ეს უკვე წარსულია, დღეს კი, მეტელკინასა და ბერულავას წყვილმა პროგრამული კომპონენტები შეფასებისას თუ დამოუკიდებლად გავშიფრავთ, ქართულმა წყვილმა კომპოზიციაში 8.00, პრეზენტაციაში 8.04, სასრიალო ხარისხში 7.96 ქულა დაიმსახურეს, რაც დღევანდელ 20 გამომსვლელს შორის ყველაზე მაღალი მაჩვენებელი იყო. საერთო ჯამში ქართულმა წყვილმა ვერ მოახერხა სეზონის საუკეთესო შედეგის გამეორება თუმცა, 69.18 (37.26 / 31.92) ქულით, მაინც მოახერხეს მოკლე პროგრამაში პირველი ადგილის დაკავება და თავისუფალ პროგრამას ლიდერის სტატუსითაც ისრიალებენ.

თავისუფალი პროგრამით ანასტასია და ლუკა ხვალ, 1 მარტს იასპარეზებენ. ხვალვე, გათამაშდება მედლები ქალთა ერთეულთა თანრიგში, სადაც მოკლე პროგრამის შემდეგ, მეორე საფეხურზე ჩვენი ინგა გურგენიძე და პოდიუმზე მოხვედრის კარგი შანსი აქვს.