ანასტასია მეტელკინა და ლუკა ბერულავა 2026-2027 წლების გრან პრის სერიის პირველი ეტაპის გამარჯვებულები არიან. დღეს ანჟეში ISU-ის სერიის ექვსიდან პირველი ეტაპი Grand Prix de France-ი ბიჭების ერთეულთა თანრიგით დასრულდა, თუმცა, ჩვენ იქ არ გვყავდა წარმომადგენელი. აი სპორტულმა წყვილმა კი, პირველ ორ დისციპლინაში აღებული ვერცხლის მედლები (იხილეთ ბმული) ოქროში გადაცვალა.

თავისუფალ პროგრამაში ანასტასია მეტელკინასა და ლუკა ბერულავას, რომლებიც მოკლე პროგრამის შემდეგ ლიდერები იყვნენ და ნეიტრალური ქვეყნის სტატუსით მოასპარეზე რუს წყვილს დაახლოებით 4 ქულით უსწრებდნენ, თავისუფალი პროგრამის მოსაგებად, 120.33 ქულა სჭირდებოდათ. ბუნებრივია, როდესაც ყინულზე ბოლო გამოდიხარ და იცი, რომ ახლა, წარმატება უკვე მხოლოდ შენს ხელთ არის, ნერვიულობაც მატულობს.

„ნამდვილად გვინდა გრან პრის ფინალში მოხვედრა და მოგებაც. ჩვენ არ გვერიდება ამის ხმამაღლა თქმის. ჩვენ, ერთხელ უკვე მივიღეთ მონაწილეობა ფინალში და ახლა, უფრო მეტის მიღწევა გვინდა", - ამბობს მეტელკინა შეჯიბრის დასრულების შემდეგ. მანამდე კი, ტრადიციულად მე-3 და კიდევ მე-6 ელემენტებზე შეცდომები დაუშვა და ამის გამო, უფრო დაბალი შეფასებაც მივიღეთ, ვიდრე, ჩვენმა წყვილმა, თუნდაც, რამდენიმე კვირის წინ, ბათუმში გამართულ თრიალეთის თასზე დააფიქსირა თავისუფალ პროგრამაში (135.82). თუმცა, გამარჯვებულებს არ ასამართლებენ და რეალურად თუ არ ჩავთვლით, ბათუმში გამართულ ხსენებულ ტურნირს, ეს ჩვენი სახელოვანი მოციგურავე წყვილისთვის პირველი გამოცდა იყო, რომელსაც თავი გაართვეს და სახლში გამარჯვებულები ბრუნდებიან.

თავისუფალ პროგრამაში დაშვებული შეცდომების მიუხედავად, დღეს ჩვენმა წყვილმა 127.31 (59.95 /68.36) ქულა დააფიქსირა, რაც პროგრამის მოსაგებადაც საკმარისი აღმოჩნდა და ორი პროგრამის ჯამში, „თრიალეთის თასის" შემდეგ, წლის მეორე ტიტულის მოსაგებადაც.

„რაც დღეს ჩვენგან იხილეთ იყო ცუდი. ჩვენ ბევრად უკეთ შეგვიძლია ასპარეზობა და ბევრად უფრო სუფთად. მართლა ვერ ვგრძნობ თავს, გამარჯვებულად, მიუხედავად იმისა, რომ მოვიგეთ. ჩვენი მიზანია სუფთა სრიალი და ნამდვილი ბრძოლა მომავალში. ჩვენ გავაგრძელებთ მუშაობას, რათა მომავალში საუკეთესო შედეგები ვაჩვენო", - ამბობს ლუკა ბერულავა, რომელიც მეწყვილესთან შედარებით, ბევრად კრიტიკული იყო საკუთარ გამოსვლასთან დაკავშირებით.

ორი პროგრამის ჯამში ანასტასიამ და ლუკამ 204.65 ქულა დააგროვეს და 6.99-ით გადაასწრეს მეორე ადგილზე გასულ რუსულ წყვილს, რომლებმაც აქვს უნდა აღვნიშნოთ, რომ არანაკლები შეცდომა დაუშვეს, ვიდრე ჩვენებმა.

შეგახსენებთ, რომ 2026-2027 წლების სეზონზე, ISU Grand Prix-ი, ტრადიციულად 6 ეტაპისგან შედგება. ამ ექვსი ეტაპის შედეგად საუკეთესო რეიტინგის მქონე 6-6 სპორტსმენი/წყვილი თითოეულ დისციპლინაში დეკემბერში დიდ გრან-პრის ფინალში მთავარი ჯილდოსთვის იბრძოლებს. ფინალი კი, ჩონცინში, ჩინეთში გაიმართება.

Grand Prix de France-ის გარდა, რომელიც დღეს დასრულდა მოციგურავეთა გრან პრის ეტაპების კალენდარი ასე გამოიყურება:

II ეტაპი Skate Canada International (კელოუნა, კანადა) - 30 ოქტომბერი - 1 ნოემბერი

III ეტაპი Cup of China (შენჟენი, ჩინეთი) - 6-8 ნოემბერი

IV ეტაპი Skate America (ევერეტი, აშშ) - 13-15 ნოემბერი

V ეტაპი Finlandia Trophy (ჰელსინკი, ფინეთი) - 20-22 ნოემბერი

VI ეტაპი NHK Trophy (ტოკიო, იაპონია) - 27-29 ნოემბერი

ფოტო: (c) ISU